Կոտայքի մարզի շնորհալի զավակները - Սամվել Հայրումյան. Ընտանեկան բժշկության զարգացման ու սրտաբանության նվիրյալը
Առողջապահական համակարգի արդյունավետությունը մեծապես կախված է առաջնային պահպանման օղակի որակից և ապացուցողական բժշկության վրա հիմնված մոտեցումներից։ Այս ոլորտում իր ուրույն ներդրումն ունի հայտնի սրտաբան, «Կարդիոմեդ» ընտանեկան բժշկական կենտրոնի տնօրեն և ՀՀ առողջապահության նախարարության ընտանեկան բժշկության գծով խորհրդատու Սամվել Հայրումյանը։
Կրթություն և մասնագիտական կայացում
Սամվել Հայրումյանը ծնվել է 1967 թվականի դեկտեմբերի 24-ին Աբովյան քաղաքում։ 1985–1993 թվականներին գերազանցությամբ ավարտել է Երևանի Մխիթար Հերացու անվան պետական բժշկական համալսարանը՝ «Բուժական գործ» մասնագիտությամբ։
Հետագա տարիներին նա շարունակաբար խորացրել է իր մասնագիտական գիտելիքները․
1993–1995 թթ.՝ Կլինիկական օրդինատուրա Սրտաբանության գիտահետազոտական ինստիտուտում («Սրտաբանություն»)։
1997 թ.՝ Վերապատրաստում Առողջապահության ազգային ինստիտուտում («Կլինիկական էխոկարդիոգրաֆիա»)։
2009 թ.՝ Վերապատրաստում ԵՊԲՀ-ում («Ընտանեկան բժշկություն»)։
Աշխատանքային ուղի և ղեկավար գործունեություն
Բժիշկ Հայրումյանի աշխատանքային գործունեությունը սկսվել է 1995 թվականին Բյուրեղավանի բժշկական կենտրոնում որպես տեղամասային թերապևտ և սրտաբան։ 1994–2009 թվականներին նա աշխատել է «Աբովյանի բժշկական կենտրոն» ՓԲԸ-ում՝ որպես հերթապահ թերապևտ, ապա տեղամասային թերապևտ և ընտանեկան բժիշկ։
2010–2018 թվականներին աշխատել է «Սպորտային բժշկության և հակադոպինգային ծառայության հանրապետական կենտրոնում» որպես սրտաբան։
2013 թվականից մինչ օրս՝ «Կարդիոմեդ» ընտանեկան բժշկական կենտրոնի հիմնադիր-տնօրենն է։
2018 թվականից մինչ օրս՝ ՀՀ առողջապահության նախարարության ընտանեկան բժշկության գծով խորհրդատուն է։
Մասնագիտական հետաքրքրություններ և միջազգային ճանաչում
Սամվել Հայրումյանի մասնագիտական գործունեության առանցքում են աթերոսկլերոզի և սրտանոթային հիվանդությունների վաղ հայտնաբերումն ու բուժումը, ոչ վարակիչ հիվանդությունների կանխարգելումը, ինչպես նաև ապացուցողական բժշկության սկզբունքների ներդրումը։
Նա պարբերաբար մասնակցում է տեղական և միջազգային հեղինակավոր գիտաժողովների, այդ թվում՝ Եվրոպական սրտաբանների ասոցիացիայի միջազգային համաժողովին (Լոնդոն), Սրտաբանների Եվրասիական Ասոցիացիայի վեհաժողովներին և Ընտանեկան բժշկության միջազգային համաժողովներին։